“जैन इंग्लिश स्कूल दुर्घटना: पालक प्रतिनिधीमंडळाची एसपी बंसल यांच्याकडे धाव, तातडीच्या कारवाईची मागणी”
जाफराबाद/विशाल देशमुख,दि.4
श्री एम.एस. जैन इंग्लिश स्कूलमध्ये १२ नोव्हेंबर २०२५ रोजी स्लॅबचा एक भाग कोसळून अनेक विद्यार्थी जखमी झाल्याची गंभीर घटना घडली होती. या प्रकरणी पालक हारेसखान खुद्दुसखान पठाण यांनी शाळा व्यवस्थापनाने जाणूनबुजून केलेल्या निष्काळजीपणाचा आरोप करत सदर बाजार पोलीस ठाण्यात तक्रार दाखल केली होती. मात्र तक्रार दाखल होऊनही कोणतीही कारवाई न झाल्याने नाराज पालकाने सोमवारी सायंकाळी शिष्टमंडळासह जिल्हा पोलिस अधीक्षक अजयकुमार बंसल यांची भेट घेऊन त्यांना निवेदन सादर केले आणि तात्काळ कठोर कारवाई करण्याची मागणी केली. एसपी बंसल यांनी हा प्रकार अत्यंत गंभीर असल्याचे नमूद करत सदर बाजार पोलीस ठाण्यास आवश्यक तपास करून योग्य ती कारवाई करण्याचे निर्देश दिले जातील, असे आश्वासन दिले.
निवेदनात म्हटले आहे की शाळेची इमारत सुमारे ३० वर्षे जुनी असून येथे १२०० हून अधिक विद्यार्थी शिक्षण घेतात. इतकी जुनी इमारत असतानाही तिच्या दुरुस्ती, स्थावर तपासणी आणि सुरक्षा मानकांचे पालन केले गेले नाही, त्यामुळे संपूर्ण इमारत जर्जर होऊन धोकादायक स्थितीत पोहोचली आहे.१२ नोव्हेंबर रोजी सकाळी १०:५५ वाजता पहिल्या मजल्यावरील हॉलमध्ये विद्यार्थी भोजन करत असताना अचानक छताचा भाग कोसळला आणि यात चार विद्यार्थी जखमी झाले. या विद्यार्थ्यांपैकी एकाची प्रकृती गंभीर झाल्याने त्याला तातडीने आय सी यु मध्ये दाखल करून उपचार देण्यात आले.
शिष्टमंडळाने असा आरोपही केला आहे की संपूर्ण घटना शाळेच्या सीसीटीव्ही कॅमेऱ्यांमध्ये रेकॉर्ड झाली होती; मात्र निष्काळजीपणा लपवण्यासाठी शाळा व्यवस्थापनाने हे फुटेज जाणीवपूर्वक नष्ट केले. त्यामुळे शाळा व्यवस्थापनाविरुद्ध संबंधित भारतीय न्याय संहिता कलमांनुसार गुन्हा दाखल करून सदर बाजार पोलिसांना तातडीने कठोर कारवाईचे निर्देश द्यावेत, अशी मागणी पालकांनी केली. प्रतिनिधीमंडळात हारेसखान खुद्दुसखान पठाण, अॅड. खुर्रम खान, मराठवाडा शिक्षक संघाचे जालना जिल्हा कार्याध्यक्ष फरखुंदअली सैय्यद,कोषाध्यक्ष नारायण मुंडे, उपाध्यक्ष जगन वाघमोडे,अंबड तालुका सचिव गणेश मेहेत्रे यांच्यासह इतर पदाधिकारी सहभागी होते.
